सेलूत सुंदर हस्ताक्षर स्पर्धेचे आयोजन

सेलू ( प्रतिनिधी )दि 21
गटशिक्षणाधिकारी कार्यालय, सेलू व कल्याणम एज्युकेशन सोसायटी यांच्या संयुक्त विद्यमाने सेलूत जागतिक हस्ताक्षर दिनाचे औचित्य साधून सुंदर हस्ताक्षर स्पर्धेचे आयोजन करण्यात आले आहे .
२३ जानेवारी २०२५ गुरुवार रोजी या एकाच दिवशी या स्पर्धा तालुकास्तरावर घेतल्या जाणार आहेत . तालुक्यातील खाजगी अनुदानित, समाज कल्याण ,जिल्हा परिषद ,अंशतः अनुदान, विनाअनुदान, स्वयंअर्थसहायीत या सर्व शाळेतील विद्यार्थ्यांना या स्पर्धेत सहभागी केले जाणार आहे . या स्पर्धेचे हे प्रथम वर्ष असून स्पर्धा दोन गटांत होणार आहे.

यामध्ये पाचवी ते सातवी आणि आठवी ते दहावी अशा दोन गटात ही स्पर्धा राहणार आहेत. स्पर्धेसाठी उतारा लिहिण्याकरिता भारताचे संविधान ( उद्देशिका ) निवडण्यात आले आहेत. सध्याच्या संगणक व मोबाईल च्या युगात हस्तलेखन दिवसेंदिवस मागे पडत चालले आहे .त्यातही हाताने मराठीतून लिहणे तर दूरच .सुंदर हस्ताक्षर ही एक कला असून खरा दागिनाच आहे .त्यासाठी ही कला कालबाह्य होऊ नये .व मुलांनी पुन्हा एकदा लेखनाकडे गांभीर्याने पाहावे व हस्ताक्षर सुधारावे तसेच मराठी भाषेचा प्रसार व्हावा या प्रमुख उद्देश समोर ठेऊन या स्पर्धेचे आयोजन करण्यात येत आहे.
दोन्ही गटांतील प्रथम,द्वितीय, तृतीय क्रमांक पटकवणाऱ्या विजेत्यांना रोख रक्कम व सन्मानपत्र मान्यवरांच्या हस्ते देऊन गौरविण्यात येईल.
दोन्ही गटातील विद्यार्थ्यांसाठी एकच उतारा देण्यात येणार असून स्पर्धेतील सहभागी सर्व स्पर्धकांचे उतारे शाळेने एका मोठ्या पाकिटात टाकून त्यावर शाळेचे नावं,मुख्याध्यापकाचे नावं ,मोबाईल क्रमांक टाकून दोन दिवसांच्या आत गट साधन केंद्र ,सेलू येथेजमा करावीत असे आवाहन गटशिक्षणाधिकारी ,गट साधन केंद्र सेलू यांनी सर्व केंद्र प्रमुख व मुख्याध्यापकांना एका पत्राद्वारे कळवले आहे .स्पर्धकांनी उतारा लिहिताना पेनचा एकेरी ओळी असलेल्या कागदावर दोन्ही बाजूनी समास सोडावा .उतारा लिहिण्यासाठी ३० मिनिटांचा वेळ देण्यात येणार असून स्पर्धेच्या कागदावर कसल्याही प्रकारची खाडाखोड न करता शाळेचे नावं ,विद्यार्थ्यांचे नावं ,इयत्ता व मोबाईल नंबर चा आवर्जून उल्लेख करावा .असे देखील कळविण्यात आले आहे .
स्पर्धेतील दोन्ही गटातील प्रथम येणाऱ्या विद्यार्थ्यांच्या शाळेस शिक्षण विभाग पंचायत समिती सेलू व कल्याणम एज्युकेशन सोसायटी मार्फत सन्मानचिन्ह देऊन गौरवण्यात येणार आहे .
तरी या स्पर्धेत तालुक्यातील जास्तीतजास्त शाळांनी सहभाग नोंदवावा असे आवाहन गटशिक्षणाधिकारी उमेश राऊत व निशिकांत पाटील ,अध्यक्ष कल्याणम एज्युकेशन सोसायटी यांनी केले आहे .