परभणी,दि 11 ः
आमदार डॉ.राहुल पाटील यांच्या संपर्क कार्यालयात निर्माल्य संकलन ग्रुपतर्फे आशीर्वाद रुपी बैठक घेण्यात आली. महाविकास आघाडी तथा शिवसेना उबाठा गटाचे परभणीचे उमेदवार आमदार डॉ. राहुल पाटील यांच्या प्रचारार्थ झालेल्या बैठकीस निर्माल्य संकलन ग्रुप, ज्येष्ठ नागरिक मंचचे सदस्य, ब्राह्मण समाजाचे प्रतिष्ठित नागरिक, पुजारी उपस्थित होते. बैठकीत शहरात सुसज्ज ब्राह्मण भवन उभारण्याचे आश्वासन आमदार डॉ.राहुल पाटील यांनी दिले. यावेळी शिवाजीराव वांगे, नित्रुडकर गुरुजी, वेंकटेश शर्मा पदु देवा जोशी पालमकर, विलास तळणीकर, गजानन जोशी, कुलकर्णी, यांच्यासह असंख्य निर्माल्य संकलन ग्रुप चे सदस्य उपस्थित होते.
आमदार डॉ.पाटील म्हणाले, ब्राह्मण समाजासाठी परशुराम आर्थिक विकास महामंडळ स्थापन करण्याच्या मागणीसाठी परभणीतील शिष्टमंडळासमवेत मी सुद्धा उपमुख्यमंत्री फडणवीस यांच्याकडे पाठपुरावा केला होता. अखेर या मागणीस यश आले आणि परशुराम आर्थिक विकास महामंडळ स्थापन झाले. आता परभणीत ब्राह्मण समाजासाठी सुसज्ज ब्राह्मण भवन उभारू. पुजारी आणि त्यांच्या कुटुंबीयांसाठी परभणी मेडिकल कॉलेज ला मोफत उपचार सुद्धा उपलब्ध करून दिले जाणार आहेत. निर्माल्य संकलन ग्रुपचे ८० हून अधिक सदस्य उपस्थित होते. आ.डॉ. राहुल पाटील यांना आशीर्वाद देत या निवडणुकीत त्यांच्यासोबत राहण्याचा निर्णय घेतला.
परभणीतील कलावंतांची बैठक
शहरातील स्थानिक कलावंताची बैठक वैष्णवी मंगल कार्यालयात रविवारी झाली. शहरातील कलावंताच्या प्रमुख मागणी, समस्या या आजपर्यंत शासन दरबारी आमदार डॉ. राहूल पाटील यांनी मांडल्या आहेत. यात नवीन नाट्यगृह निर्मीतीमध्ये त्यांनी विशेष प्रयत्न केले. वेळोवेळी निधीसाठी पाठपुरावा केला. आता उर्वरित निधी या शासनाने दिला नाही. तरी आगामी काळात या नाट्यगृहासाठी निधी आणण्यास प्राधान्य दिले जाईल, असे आश्वासन या प्रसंगी डॉ.विवेक नावंदर यांनी उपस्थितांना दिले.