नवी मुंबईत रविवारी २३ रुग्ण आढळून आल्याने खळबळ

नवी मुंबई, संदीप निकाळजे – नवी मुंबईत रविवारी २३ रुग्ण आढळून आल्याने खळबळ उडाली आहे. आतापर्यंतची ही सर्वाधिक वाढ आहे. शहरातील एकूण रुग्णांची संख्या १३१वर पोहोचली आहे.

नेरूळ सेक्टर-५० येथे राहणाऱ्या व भायखळा येथील प्रिन्स अली खान रुग्णालयात कार्यरत असलेल्या करोना पॉझिटिव्ह डॉक्टरच्या संपर्कात आलेल्याच्या कुटुंबातील सहा पुरुष आणि तीन महिला अशा नऊ व्यक्तींची करोना चाचणी पॉझिटिव्ह आली. कोपरखैरणे सेक्टर २३ येथे भाजीविक्रेता असणाऱ्या एका करोना रुग्णाच्या संपर्कात त्याचा ३७ वर्षीय शेजारी आला असता त्याला करोनाचा संसर्ग झाला. तसेच महापे येथे एका आयटी बँकिंग क्षेत्रातील कंपनीतील आणखी एका २६ वर्षीय कर्मचाऱ्याचा अहवाल पॉझिटिव्ह आला. हा कर्मचारी घणसोली येथील रहिवासी आहे. नेरूळ शिवाजीनगर येथील एका ६० वर्षीय व्यक्तीचा अहवाल पॉझिटिव्ह आला. त्या व्यक्तीच्या संपर्कात आलेल्या एका ३८ वर्षीय पुरुष व ३२ वर्षीय महिला अशा पती-पत्नीलाही लागण झाल्याचे समोर आले. त्याचबरोबर कोपरखैरणे सेक्टर-२ येथील २८ वर्षीय महिलेची चाचणी पॉझिटिव्ह आली. ही महिला मुंबईच्या शताब्दी रुग्णालयात परिचारिका म्हणून कार्यरत आहे. तळवली गाव येथील २१ वर्षीय गृहिणीला करोनाची लागण झाली. तसेच शिरवणे सेक्टर-१ येथील एका ५५ वर्षीय पोलिस हवालदाराचा अहवाल पॉझिटिव्ह आला. हा पोलिस मुंबईतील बैंगणवाडी पोलिस ठाण्यात कार्यरत आहे. सानपाडा सेक्टर-५ येथे राहणाऱ्या कॅमेरामन आणि त्याची ३० वर्षीय पत्नी या दोघांना करोनाची लागण झाली. तुर्भे सेक्टर-१९ येथील स्वीकार हॉटेलमधील २५ वर्षीय वेटर, नेरूळ सेक्टर-२० येथील तेरणा रुग्णालयात वॉर्डबॉयचे काम करणारा तरुण, तुर्भे इंदिरानगर येथील ३१ वर्षीय व्यक्ती, वाशी सेक्टर-१६ बी येथील सामाजिक कार्यकर्ती यांनाही करोनाचा संसर्ग झाला.