ब्रिटनमध्ये कोरोनाची तिसरी लाट येण्याची भीती

शब्दराज ऑनलाईन,दि 29ः
ब्रिटनमध्ये मागील काही दिवसांपासून करोनाबाधितांच्या संख्येत वाढ होत आहे. ब्रिटनमध्ये करोनाची तिसरी लाट येण्याची भीती व्यक्त केली जात आहे. करोनाच्या B.1.617.2 या वेरिएंटमुळे बाधितांच्या संख्येत वाढ होत आहे. याच वेरिएंटमुळे ब्रिटनमध्ये करोनाची तिसरी लाट येण्याची शक्यता तज्ज्ञांनी वर्तवली आहे.

ब्रिटनमध्ये आतापर्यंत ३.८ कोटी लोकांना लशीचा पहिला डोस मिळाला आहे. एकूण लोकसंख्येच्या प्रमाणात ही संख्या ५८ टक्के आहे. लसीकरण व्यापक प्रमाणावरही होऊनही बाधितांची संख्या वाढत असल्याने अनेक शंका उपस्थित करण्यात येत आहे.ब्रिटनच्या रुग्णालयात दाखल होणाऱ्या बाधितांची संख्या वाढत आहे. करोनाच्या B.1.617.2 हा वेरिएंट वेगाने फैलावत आहे. संपूर्ण ब्रिटनमध्ये मागील आठवड्यात रुग्णालयात दाखल होणाऱ्यांची संख्या २० टक्क्यांनी वाढली आहे. उत्तर-पश्चिम भागात हे प्रमाण २५ टक्के इतके आहे. स्कॉटलंडमधील काही भागांमध्ये यापेक्षाही अधिक प्रमाण आहे. स्कॉटलंडचे एनएचएस रुग्णालयाचे डॉक्टर अविरल वत्स यांनी सांगितले की, लॉकडाउनचे निर्बंध मागे घेण्यात आल्यामुळे बाधितांची संख्या वाढण्याची भीती याआधीच व्यक्त करण्यात आली होती. ब्रिटनमध्ये जून अखेरीस शेवटच्या टप्प्यातील लॉकडाउन निर्बंध मागे घेण्याची शक्यता व्यक्त केली जात आहे.डॉ. वत्स यांनी सांगितले की, लसीकरणामुळे वृद्ध, ज्येष्ठ नागरिकांमध्ये संसर्गाचे प्रमाण कमी झाल्याचे दिसून आले आहे. बहुतांशी वृद्धांना करोनाचे दोन्ही डोस देण्यात आले आहेत. रुग्णालयात दाखल होणाऱ्या बाधितांची संख्या वाढली आहे. मात्र, मागील वर्षीच्या तुलनेत हे प्रमाण कमी आहे. करोनामुळे रुग्णालयात दाखल होणे आणि मृतांच्या संख्येत ६० ते ७० टक्के घट झाली आहे

भारतासाठी चिंता का?
ब्रिटनमध्ये सध्या करोनाबाधितांमध्ये युवकांची संख्या मोठी आहे. भारतातही करोनाच्या तिसऱ्या लाटेत युवक बाधित होणार असल्याची भीती तज्ज्ञांनी व्यक्त केली होती. भारतात करोना लसीकरणाचा वेगही कमी आहे. आतापर्यंत भारतात २० कोटींहून अधिकजणांना करोना लस देण्यात आली आहे. मात्र, त्यापैकी जवळपास चार कोटी जणांना लशीचे दोन्ही डोस देण्यात आले आहेत.