भक्ती रिसर्च सेंटर सातारा तर्फे संजय खरात यांचा विशेष सन्मान

सातारा – जिल्हा परिषद प्राथमिक शाळा वडगाव ता.माण या शाळेचे मुख्याध्यापक श्री.संजय लक्ष्मण खरात यांनी कोरोना कालावधीत घरोघरी शाळा निर्माण करून शिक्षण क्षेत्रात उल्लेखनीय कार्य केल्याबद्दल भक्ती रिसर्च सेंटर सातारा यांचेकडून श्री.संजय खरात यांना विशेष सन्मान देवून गौरवण्यात आले .

कोरोना संकटामुळे सर्वत्र शाळा बंद असल्यामुळे सर्वत्र ऑनलाईन शिक्षण सुरू झाले होते. परंतु ऑनलाईन शिक्षणामुळे विद्यार्थ्याच्या आरोग्यावर होणारे दुष्परिणाम टाळण्यासाठी तसेच १००% विद्यार्थ्याना प्रभावीपणे शिक्षण देण्यासाठी प्रत्येक विद्यार्थ्याच्या घरातच स्वतंत्र शाळा तयार करून विद्यार्थ्यांचे शिक्षण अखंडीतपणे सुरू ठेवले. यासाठी प्रत्येक विद्यार्थ्यास स्वत: तयार केलेला स्वतंत्र शैक्षणिक साहित्याचा संच मोफत देण्यात आला.विद्यार्थ्याच्या घर व परिसरात शैक्षणिक वातावरण निर्माण केले.कोरोना संकटामुळे अगोदरच अडचणीत सापडलेल्या पालकांना अधिक आर्थिक ताण येवु नये म्हणून घरोघरी शाळा तयार करण्यासाठी लागणारा सर्व खर्च श्री.संजय खरात सर यांनी केला.जुलै-२०२० पासून एप्रिल अखेर एकूण ३५०० वेळा गृहभेटी करून विद्यार्थ्यांचे शिक्षण अखंडीतपणे सुरू ठेवले आहे. त्यांच्या या कार्याची दखल घेवून शाळेला मंदिर व शिक्षकांना देव मानून ३६५ दिवस शिक्षक दिन साजरा करून उल्लेखनीय काम करणाऱ्या शिक्षकांचा प्रत्यक्ष घरी जावून सत्कार करणारे भक्ती रिसर्च सेंटर साताराचे डॉ.अशोकराव पाटील यांनी श्री.संजय खरात यांचा सन्मानपत्र व उज्वला सहाणे लिखित प्रेरणा हे पुस्तक भेट देवून विशेष सन्मान केला.

भक्ती रिसर्च संस्था ही संपूर्ण महाराष्ट्रभर शैक्षणिक ,सामाजिक व सांस्कृतीक क्षेत्रात उल्लेखनीय काम करणाऱ्या मान्यवरांचा सन्मान करून त्यांना प्रेरणा देण्याचे काम करत आहे.विविध शाळा तसेच गरीब कुटुंबातील मुले दत्तक घेवून त्यांच्या शिक्षणाची सर्व जबाबदारी स्वीकारते.अशा समाजसेवी संस्थेकडून श्री.संजय खरात यांना हा विशेष सन्मान प्राप्त झाल्याबद्दल जिल्हयातील विविध स्तरातून त्यांचे कौतुक व अभिनंदन होत आहे.