समता नगर, गणेश नगर मधील नागरिकांची रस्त्यावाचून कोंडी

सेलू ( नारायण पाटील)

येथील लक्ष्मी मॉल ते नूतन महाविद्यालय या रोडचे रुंदीकरणाचे काम चालू असल्यामुळे रस्ता जवळपास बंद आहे .अशावेळी समता नगर व गणेश नगर मधील नागरिक क्रांती चौकात व आठवडी बाजारात येण्यासाठी पर्यायी रस्ता म्हणून शिवाजी नगर मधून ये जा करत होते .
परंतु काल पासून शिवाजीनगर मधील या रस्त्याचे काम सुरू झाल्यामुळे गणेशनगर व समतानगर वासियांची चांगलीच कोंडी झाली असून त्यांना क्रांती चौकात व बाजारात येण्यासाठी कोणताच रस्ता नाही .त्यामुळे या भागातील नागरिकांना नाविलाजास्तव रामनगर मधून शिवाजीनगर मार्गे पायपीट करावी लागत आहे . एखाद्या अत्यवस्थ असलेल्या रुग्णाला दवाखान्यात आणणे देखील यामुळे जिकरीचे बनत आहे .व पर्यायी रस्ता काढीत रुग्णाला दवाखान्यात नेण्यासाठी विलंब देखील होत आहे .तसेच आता शाळा देखील सुरू होणार असल्यामुळे विद्यार्थ्यांची देखील चांगलीच गैरसोय होणार आहे .
वास्तविक पाहता रस्त्याचे काम सुरू करतांना नागरिकांना एखाद्या पर्यायी रस्त्याची व्यवस्था करून देणे गरजेचे आहे .परंतु याकडे ठेकेदाराकडून जाणीवपूर्वक दुर्लक्ष केले जात असल्यामुळे जनतेमधून तीव्र संताप व्यक्त केल्या जात आहे .