सेलूत “स्मृतिगंध” या ग्रंथाचे थाटात प्रकाशन

सेलू / नारायण पाटील – नूतन महाविद्यालय सेलू व महाविद्यालयातील सेवानिवृत्त कर्मचारी यांच्या संयुक्त विद्यमाने ” स्मृतीगंध या ग्रंथाचा प्रकाशन सोहळा व मा .प्राचार्य द रा कुलकर्णी यांचा अभिष्टचिंतन सोहळा मोठ्या उत्साहात साजरा झाला .
नूतन महाविद्यालयाच्या कै पं .या .तरफदार सभागृहात आयोजित प्रकाशन सोहळ्याच्या अध्यक्षस्थानी संस्थेचे अध्यक्ष डॉ एस एम लोया हे होते .तर प्रमुख अतिथी म्हणून मा .प्राचार्य द रा कुलकर्णी यांची उपस्थिती होती .बसवेश्वर महाविद्यालय लातूर चे माजी प्राचार्य डॉ सोमनाथ रोडे यांच्या शुभ हस्ते स्मृतिगंध या ग्रंथाचे प्रकाशन करण्यात आले .

उपस्थित मान्यवरांच्या हस्ते स्वामी रामानंद तीर्थ व कै .श्रीरामजी भांगडीया यांच्या प्रतिमेचे पूजन व दीपप्रज्वलन करण्यात आले .यावेळी सच्छिदानंद डाखोरे यांच्या संचाने लिंबेकर सर रचित “बीजे रुजविली नवं श्रुजनाची” हे विमोचन गीत तर “ग्रंथ आमचे हाती ग्रंथ आमचे साथी” स्वागत गीत सादर केले .यावेळी तबला साथ गिरीश दीक्षित यांनी दिली .

यावेळी व्यासपीठावर डॉ प्रभाकर देव ,प्राचार्य वाघमारे ,डी के देशपांडे, डॉ शरद कुलकर्णी ,गौतम सूर्यवंशी,प्राचार्य उत्तम राठोड ,विनायकराव कोठेकर ,महेंद्र शिंदे ,गंगाधर गळगे ,अरविंद जोशी ,प्रा झोडगे ,प्रा.हडसनकर,प्रा पत्की यांची प्रमुख उपस्थिती होती.
या स्मृतिग्रंथ या ग्रंथात संस्थेतील ३२ माजी कर्मचाऱ्यांनी त्यांच्या आठवणींना उजाळा दिलेला आहे .
डॉ विनायकराव कोठेकर यांनी प्रास्ताविकात या कार्यक्रमामागील उद्देश वअसलेली भावना व्यक्त केली .यावेळी पाहुण्यांचा परिचय प्रा गंगाधर गळगे यांनी दिला .
नूतन महाविद्यालयाचे निवृत्त ग्रंथपाल प्रा अरविंद जोशी यांनी लिहलेल्या “स्मरण रंजन एका ग्रंथपालाचे” ग्रंथाचे देखील यावेळी मान्यवरांच्या हस्ते प्रकाशन करण्यात आले.

मोठ्या थाटामाटात ग्रंथदिंडी काढून यावेळी मान्यवरांच्या हस्ते दोन्ही ग्रंथाचे प्रकाशन करण्यात आले . डॉ सोमनाथ रोडे यांनी मनोगतात स्पष्ट केले की उपक्रमशील शिक्षण संस्था म्हणून नूतन संस्थेचा सर्वत्र गौरव करण्यात येतो . यावेळी त्यांनी तत्कालीन हैद्राबाद मुक्ती संग्राम लढ्यातील आठवणींना उजाळा दिला व स्वामी रामानंद तीर्थ यांच्या देशसेवा व समाजसेवेची ओळख करून दिली .
नैतिकतेचे व चारित्र्याचे माप दंड टिकवून ठेवणारी नूतन संस्था ही एकमेव संस्था आहे .२५ वर्ष या महाविद्यालयाची सेवाभावी व समर्पित भावनेने द रा कुलकर्णी यांनी या संस्थेची धुरा यशस्वीपणे सांभाळली .या संस्थेचा चारित्र्य व नीतिमत्तेचा भक्कम पाया संस्थाचालक ,कर्मचारी यांनी रचलेला आहे .सध्याच्या युगात शिक्षण क्षेत्र दर्जेदार राहिले नाही . तरी देखील शिक्षणाचा दर्जा ठेवण्याचे काम या संस्थेत केले जात आहे .

स्मृतिगंध या ग्रंथातील लेखांमधून प्रत्येकाला आत्मपरिक्षण करण्याची संधी उपलब्ध करून दिली आहे .अशक्य ला शक्य करण्याची जबाबदारी ठेवणारेच खरे शिक्षक असतात .गुणवत्तेची मदार नूतन संस्थेने कधी कमी पडू दिली नाही .ही अभिमानाची गोष्ट आहे .भागडीयाच्या कार्याचा धागा तुटू न देता तो जास्त पिळदार करण्याचा प्रयत्न नूतन संस्थेत सतत केला जातो . उगवण्यासाठी बीजाला आधी जमिनीत गाडून घ्यावेच लागते .व हेच या ग्रंथातील लेखातून स्पष्ट करण्यात आले आहे . संस्थाचालक व परिसराने निर्माण केलेली आत्मीयता व मायेचा पाझर कधीच आटणार नाही .व संस्थेची वर्जमुठ कधीच तुटणार नाही अशी ग्वाही देखील रोडे यांनी यावेळी दिली
केवळ चार भिंतीच्या आत शिक्षण न देता समाजाचे दुःख ,दारिद्र्य यावर फुंकर घालून समाजसेवा करणारे हे महाविद्यालय आहे .असेही रोडे यांनी स्पष्ट केले .

सर्वांच्या शुभेच्छा हीच माझी ऊर्जा आहे
सर्वांच्या प्रेमामुळे आकर्षण आहे,पुढील पिढीला प्रेरणादायी ठरावे यासाठी संस्थेतील आठवणींना उजाळा देणारे स्मृतिगंध हे पुस्तक महत्वाचे आहे .स्वातंत्र्य सैनिक घडवण्याचे व देशाबद्दल प्रेम निर्माण करण्याचे काम नूतन संस्थेने केले आहे .असे प्रतिपादन यावेळी सत्काराला उत्तर देतांना मा .प्राचार्य द रा कुलकर्णी यांनी केले .

या कार्यक्रमासाठी माजी नगराध्यक्ष विनोद बोराडे ,साईबाबा बँकेचे अध्यक्ष हेमंतराव आडळकर ,माजी जी प सभापती अशोकराव काकडे ,प्रसिद्ध उद्योजक रामप्रसाद घोडके ,शेतकरी संघटनेचे नेते गोविंद भाऊ जोशी ,के बा शिक्षण संस्थेचे सचिव महेश खारकर ,किशोर जोशी यांच्या सह शहरातील प्रतिष्ठित नागरिक ,व्यापारी ,डॉक्टर ,पत्रकार तसेच महिला मोठ्या संख्येने उपस्थित होते .तसेच नूतन संस्थेचे माजी आजी माजी कर्मचारी तसेच विद्यार्थी व विद्यार्थीनी देखील उपस्थित होत्या .
यावेळी अभिष्टचिंतन सोहळ्यानिमित्त उपस्थित सर्वांनी शाल व पुष्पहार घालून भावी आयुष्यासाठी शुभेच्छा दिल्या .
कार्यक्रमाचे सूत्रसंचालन प्रा एस एन बिराजदार यांनी केले तर गौतम सूर्यवंशी यांनी उपस्थितांचे आभार व्यक्त केले .