१६ ऑगस्ट रोजी ‘स्वामुक्टा’ प्राध्यापक संघटनेचा स्वारातीम विद्यापीठावर मोर्चा

परभणी,दि 13 ः
उच्च शिक्षण विभागातील अधिकाऱ्यांकडून भारतीय संविधानातील तरतुदींमध्ये “घरगुती पद्धतीने बदल करून” सुरु असलेल्या मनमानी कारभाराच्या विरोधात महाराष्ट्र प्राध्यापक महासंघाने (एमफुक्टो) विविध कृती कार्यक्रमाच्या माध्यमातून राज्यव्यापी आंदोलन पुकारण्यात आले आहे. या आंदोलनास स्वामी रामानंद तीर्थ मराठवाडा विद्यापीठ नांदेड अंतर्गत एमफुक्टो संलग्नित ‘स्वामुक्टा’ संघटनेचा जाहीर पाठींबा असून या आंदोलन कृतीचा भाग म्हणून ‘स्वामुक्टा’ संघटनेच्या वतीने दि. १६ ऑगस्ट रोजी दुपारी ३ वाजता स्वा.रा.ती.म.विद्यापीठ मुख्य प्रवेशद्वार ते प्रशासकीय इमारत असा मोर्चा काढून कुलगुरूंना निवेदन दिले जाणार आहे.
प्रमुख मागण्यांमध्ये विद्यापीठ अनुदान आयोगाच्या दि १८ जुलै २०१८ रोजीच्या अधिसुचनेची जशास तशी अंमलबजावणी करावी; एम.फिल व पीएच.डी करिता प्रोत्साहनपर वेतनवाढ सुरू ठेवावी, सहयोगी प्राध्यापक पदोन्नतीचे लाभ हे पात्रता दिनांकापासून देणे; एम.फिल. धारक प्राध्यापकांना पदोन्नतीचे लाभ तात्काळ प्रदान करावेत; १ नोव्हेंबर २००५ नंतर सेवेत आलेल्या सर्वांना जुनी पेन्शन योजना लागू करण्यात यावी; पूर्णवेळ प्राध्यापकांची रिक्त पदे तात्काळ भरण्यात यावी; नेट-सेट मुक्त शिक्षकांना नेमणुकीच्या तारखेपासून सेवा ग्राह्य धरून जुनी पेन्शन योजनेचे लाभ देण्यात यावे; प्राध्यापकांना अनुज्ञेय असलेल्या सर्व प्रकारच्या रजा लागु करण्यात याव्यात; विद्यापीठ कायदा २०१६ यास अनुसरून एकरुप परिनियम लागु करावे आदि मागण्यांचा समावेश आहे.
या मोर्चाला संघटनेचे केंद्रीय अध्यक्ष डॉ. सुर्यकांत जोगदंड, सचिव डॉ. विजय भोपाळे, कोषाध्यक्ष डॉ. दिलीप पाईकराव, उपाध्यक्ष डॉ. डी. एन. मोरे, डॉ. करूणा देशमुख, डॉ.विष्णू पवार, डॉ. सुरेखा भोसले, डॉ. लक्ष्मण शिंदे हे मार्गदशन करणार आहेत.
परभणी जिल्ह्यातील सर्व महाविद्यालयातील पूर्णवेळ व तासिका तत्वावर कार्यरत सर्व प्राध्यापकांनी मोठ्या संख्येने या मोर्चात सहभागी व्हावे असे आवाहन परभणी जिल्हा अध्यक्ष डॉ. किशोर हुगे, सचिव डॉ.नानासाहेब पाटील, कोषाध्यक्ष डॉ.मोतीराम कदम, उपाध्यक्ष डॉ.तुकाराम फिसफीसे , डॉ.गंगाधर कापुरे, डॉ.राजेश देशमुख,डाॅ.विजय भोपाळे, डॉ.सुभाष यादव, डॉ. पुष्पा गंगासागरे , डॉ.सुनिता कुकडे, डॉ.बी.एस.गिते यांनी केले आहे.