श्रेष्ठ विचाराने सकारात्मक ऊर्जा मिळते-राजयोगिनी भारतीदीदी

सेलू / प्रतिनिधी – मी कोण आहे ? म्हणजेच स्वतःला ओळखता आले, तर मन नियंत्रित होईल. बुद्धीला चालना मिळेल आणि संस्काराद्वारे सकारात्मक ऊर्जा प्राप्त होईल. त्यासाठी आत्मबोध, आत्मज्ञान होणे आवश्यक आहे. अहंकार, द्वेष, मत्सर आदी विकारांना दूर ठेवा. सर्वांप्रती स्नेह ठेवा, निस्वार्थ भाव, श्रेष्ठ विचार, आचाराने सकारात्मक ऊर्जा मिळते, असे प्रतिपादन ब्रह्माकुमारी राजयोगिनी भारतीदीदी यांनी केले आहे.

येथील प्रजापिता ब्रह्माकुमारी ईश्वरीय विश्वविद्यालयाच्या वतीने श्री साईबाबा मंदिरात सुरू असलेल्या श्रीमद् भागवत कथा ज्ञान महोत्सवाच्या दुसऱ्या दिवशी मंगळवारी (२८ जानेवारी) भारती दीदी बोलत होत्या. पोलिस निरीक्षक दीपक बोरसे, साईराज बोराडे, चेतन लोया, राम सोमणी, आनंद सोनी, जाजू, राठोड यांच्या हस्ते दीपप्रज्वलन करून कथेला सुरुवात झाली. भारतीदीदी म्हणाल्या की, संसारातील साधनांचा उपयोग करा, पण त्याला चिकटून राहू नका, शरीराचे शुद्धीकरण गंगास्नानने होईल परंतु आत्म शुद्धीकरण करण्यासाठी आत्म्याचे परमात्म्याशी मन लावावे लागेल. रात्री साडेआठ वाजता महाआरतीने दुसऱ्यादिवशीच्या कथासारची सांगता झाली.

या वेळी डॉ.एस.एम.लोया, प्राचार्य डॉ.विनायकराव कोठेकर, जयप्रकाश बिहाणी, नंदकिशोरजी बाहेती, लता गिल्डा, रामवल्लभ बाहेती, सुधीर चौधरी, रवी अग्रवाल, मयूर मिटकरी आदींसह मान्यवरांची उपस्थिती होती. सूत्रसंचालन सीमा बहेन यांनी केले. कथेला महिला, पुरूष मोठ्या संख्येने उपस्थित होते.