रेणापुर पुलावर दोन कारची समोरासमोर धडक,दोघे गंभीर जखमी

रमेश बिजुले
पाथरी,दि 22 ः
   पाथरी तालुक्यातील रेणापुर शिवारात राज्य रस्ता 61 वरील नदी पुलावर दोन कारचा समोरासमोर भीषण अपघात झाल्याची घटना सोमवार 22 ऑगस्ट रोजी दुपारी 2 वाजण्याच्या सुमारास घडली आहे . यावेळी दोन व्यक्ती गंभीर जखमी झाल्या आहेत.
   राज्य रस्ता क्रमांक 61 वर सोमवार 22 ऑगस्ट रोजी दुपारी 2 वाजण्याच्या सुमारास एका दुचाकीला वाचवण्याच्या प्रयत्नात   पाथरीहुन  नांदेड कडे जाणारी स्विफ्ट गाडी क्रमांक एम एच 14 जीडी  51 93 ही कार समोरून येणाऱ्या इंडिगो गाडी क्रमांक एम एच 22 एच  698 या कारला समोरासमोर धडकली यामध्ये इंडिगो गाडीमध्ये बसलेले पांडुरंग साहेबराव चव्हाण ( वय 60 वर्षे ) उद्धवराव पंढरीनाथ चव्हाण ( वय 60 वर्ष ) दोघे राहणार वझुर (तालुका मानवत ) गंभीर जखमी झाले .दरम्यान जखमींना ॲम्बुलन्स द्वारे पाथरी येथील एका खाजगी दवाखान्यामध्ये उपचारासाठी दाखल करण्यात आले आहे . अपघात ग्रस्त दोन्ही वाहने सायंकाळी उशिरापर्यंत अपघात स्थळावर असल्याने राज्य रस्त्यावरून होणाऱ्या वाहतुकीसाठी अडथळा निर्माण झाला होता.