भाजपा उमेदवाराचा मोबाईल हॅक..काँग्रेसवर केला आरोप 

0 55
 देशात लोकसभा निवडणुकीची रणधुमाळी सुरू आहे. आज चौथ्या टप्प्याचे मतदान प्रक्रिया पार पडत असताना नंदुरबार लोकसभेमध्ये महायुतीच्या उमेदवार असलेल्या डॉ. हीना गावित यांचा मोबाईल हॅक झाल्याची माहिती समोर आहे. आज नंदुरबार लोकसभा निवडणुकीची मतदान प्रक्रिया पार पडत असताना दिवसभर सर्वत्र शांततेत मतदान पार पडत आहेत. मात्र अशातच आज दुपारी महायुतीच्या उमेदवार असलेल्या हिना गावित यांनी आपला मोबाईल हॅक करून काँग्रेस पक्ष त्यांच्या उमेदवाराला मतदान करण्याचे आवाहन करत असल्याची धक्कादायक माहिती त्यांनी फेसबुक लाईव्हच्या माध्यमातून दिली आहे.

या प्रकरणी डॉक्टर हिना गावित यांनी पोलिसांकडे तक्रार केली आहे. पोलीस अधिकाऱ्यांना देखील याला दुजोरा दिला आहे. काँग्रेसला पराभव दिसत असल्यामुळे अशा पद्धतीचा अपप्रचार केला जात असल्याचा आरोप डॉक्टर हिना गावित यांनी केला आहे.

फेसबुकवर व्हिडिओ शेअर करत दिली माहिती 

याबाबत हिना गावित यांनी आपल्या अधिकृत फेसबुक पेजवर व्हिडिओ पोस्ट करत मतदारांना घडलेल्या प्रकाराची माहिती दिली आहे. मतदारांनी दक्ष रहावे, अशा कुठल्याही कॉलवर विश्वास ठेवू नये, असे आवाहन हिना गावित यांनी केले आहे.

हीना गावित यांचा काँग्रेसवर आरोप 

हिना गावित म्हणाल्या की, या निवडणुकीत मतदारांचा वाढता कौल पाहता काँग्रेस पक्षाच्या पायाखालची वाळू सरकली आहे. त्यांनी आता रडीचा डाव खेळायची सुरुवात केलीये. माझ्या मोबाईल नंबरला हॅक करून माझ्या मोबाईल नंबरवरून लोकांना फोन केले गेले. काँग्रेसला मतदान करण्याचे आवाहन करून मतदारांची दिशाभूल करण्याचे काम काँग्रेसकडून करण्यात आले, असा आरोप हिना गावित यांनी केला आहे. घडलेल्या प्रकारावर कायदेशीर कारवाई करण्यात आली आहे. काँग्रेस पक्षाच्या रडीच्या डावाला जनता नक्कीच उत्तर देईल. माझ्या नंबरवरून जर कुठलेही फोन आले तर मतदारांनी त्याकडे दुर्लक्ष करावे, असेही त्यांनी म्हटले आहे.

error: Content is protected !!