विभागीय तायक्वांदो स्पर्धेत ग्लोबलच्या अक्षरा महाजनला रौप्यपदक

हिंगोली,दि 31 

शिव शाहू प्रतिष्ठाण, पिंपळखुटा द्वारा संचलित व मुख्यमंत्री माझी शाळा, सुंदर शाळा पुरस्कारप्राप्त ग्लोबल पब्लिक स्कूल अँड ज्युनिअर कॉलेज, पिंपळखुटा येथील इयत्ता अकरावीची विद्यार्थिनी कु. अक्षरा महाजन हिने विभागीय तायक्वांदो स्पर्धा २०२६-२७ मध्ये रौप्यपदक पटकावून शाळेच्या शिरपेचात मानाचा तुरा रोवला आहे. तिच्या या उल्लेखनीय कामगिरीमुळे ग्लोबल पब्लिक स्कूलच्या क्रीडा क्षेत्रातील यशस्वी परंपरेत आणखी एका मानाच्या यशाची भर पडली असून संस्थेसह हिंगोली जिल्ह्याच्या क्रीडा क्षेत्रात आनंदाचे वातावरण निर्माण झाले आहे.

क्रीडा व युवक सेवा संचालनालय, महाराष्ट्र राज्य, पुणे यांच्या अंतर्गत तसेच परभणी शहर महानगरपालिका, जिल्हा क्रीडा कार्यालय, परभणी आणि जिल्हा तायक्वांदो असोसिएशन, परभणी यांच्या संयुक्त विद्यमाने विभागीय तायक्वांदो स्पर्धा २०२६-२७ चे आयोजन जिल्हा क्रीडा संकुल, परभणी येथे करण्यात आले होते. या स्पर्धेत विभागातील विविध जिल्ह्यांतील गुणवंत खेळाडूंनी सहभाग नोंदवून आपले क्रीडा कौशल्य आणि सामर्थ्य दाखविले.

या स्पर्धेत १९ वर्षांखालील मुलींच्या ४६ ते ४९ किलो वजनगटात ग्लोबल पब्लिक स्कूल अँड ज्युनिअर कॉलेजची विद्यार्थिनी कु. अक्षरा महाजन हिने सहभाग घेतला होता. स्पर्धेतील चुरशीच्या लढतींमध्ये तिने उत्कृष्ट खेळाचे प्रदर्शन करत प्रतिस्पर्धी खेळाडूंना जोरदार आव्हान दिले. आपल्या खेळातील अचूकता, चपळता, आत्मविश्वास, जिद्द आणि चिकाटीच्या जोरावर तिने द्वितीय क्रमांक मिळवत रौप्यपदकावर आपले नाव कोरले. विभागीय स्तरावरील या यशामुळे अक्षराने आपल्या क्रीडा गुणवत्तेची प्रभावी छाप उमटविली आहे.

अक्षरा महाजन हिच्या या यशामागे नियमित सराव, कठोर परिश्रम आणि योग्य मार्गदर्शनाचा मोठा वाटा आहे. शाळेचे क्रीडा शिक्षक तथा तायक्वांदो प्रशिक्षक श्री. बजरंग कदम यांनी तिला सातत्यपूर्ण मार्गदर्शन व प्रशिक्षण दिले. खेळातील तांत्रिक कौशल्य, शारीरिक क्षमता, शिस्त आणि आत्मविश्वास विकसित करण्यासाठी केलेल्या प्रयत्नांचे फलित म्हणून अक्षराने हे यश संपादन केले आहे.

ग्लोबल पब्लिक स्कूलमध्ये विद्यार्थ्यांच्या शैक्षणिक गुणवत्तेसोबतच क्रीडा, कला, सांस्कृतिक आणि विविध सहशालेय उपक्रमांना विशेष प्रोत्साहन दिले जाते. विद्यार्थ्यांमधील सुप्त गुण ओळखून त्यांना योग्य व्यासपीठ उपलब्ध करून देणे, प्रशिक्षित मार्गदर्शन देणे आणि जिल्हा, विभाग, राज्य व राष्ट्रीय स्तरावर चमकण्याची संधी निर्माण करणे, ही शाळेची वैशिष्ट्यपूर्ण परंपरा आहे. यापूर्वीही शाळेच्या विद्यार्थ्यांनी विविध क्रीडा स्पर्धांमध्ये उल्लेखनीय यश संपादन केले असून अक्षरा महाजनच्या रौप्यपदकामुळे या यशस्वी वाटचालीत आणखी एक मानाचा अध्याय जोडला गेला आहे.

अक्षरा महाजन हिच्या या यशाबद्दल शिवशाहू प्रतिष्ठानचे संस्थापक अध्यक्ष तथा माजी सरपंच श्री. दत्तराव जऊळकर, प्राचार्य प्रा. ज्ञानदत्त जऊळकर, उपप्राचार्या सौ. सुरेखा जगताप, उपप्राचार्या सौ. सीमा जऊळकर तसेच शिक्षक व शिक्षकेतर कर्मचाऱ्यांनी तिचे मनःपूर्वक अभिनंदन केले. तसेच तिला मार्गदर्शन करणारे क्रीडा शिक्षक तथा प्रशिक्षक श्री. बजरंग कदम यांचेही कौतुक केले.

अक्षराने मिळविलेले हे रौप्यपदक म्हणजे तिच्या मेहनतीचा, जिद्दीचा आणि आत्मविश्वासाचा गौरव आहे. भविष्यात तिने राज्य व राष्ट्रीय स्तरावरही उत्कृष्ट कामगिरी करून ग्लोबल पब्लिक स्कूलसह हिंगोली जिल्ह्याचा नावलौकिक अधिक उंचवावा, अशा शुभेच्छा संस्थेच्या वतीने व्यक्त करण्यात आल्या.

अक्षरा महाजन हिच्या या यशाचे सर्व स्तरांतून कौतुक होत असून ग्लोबल परिवारासाठी हा अभिमानाचा आणि आनंदाचा क्षण ठरला आहे.