शिवजयंतीनिमित्त गुगळी धामणगाव येथे भव्य रक्तदान शिबिर

सेलू ( प्रतिनिधी )
छत्रपती शिवाजी महाराज यांच्या जयंतीनिमित्त बळीराजा मित्र मंडळाच्या वतीने तालुक्यातील गुगळी धामणगाव येथे भव्य रक्तदान शिबिराचे आयोजन करण्यात आले आहे. दि. १९ फेब्रुवारी २०२६ रोजी सकाळी १० वाजल्यापासून दुपारी ३ वाजेपर्यंत हे शिबिर गुगळेश्वर महादेव मंदिराच्या प्रांगणात पार पडणार आहे.

बळीराजा मित्र मंडळाच्या वतीने गेल्या काही वर्षांपासून विविध समाजाभिमुख उपक्रम सातत्याने राबविले जात आहेत. स्वच्छता मोहीम, वृक्षारोपण, शैक्षणिक साहित्य वाटप, गरजू कुटुंबांना मदत अशा अनेक विधायक कार्यांमधून मंडळाने सामाजिक कार्याचा ठसा उमटविला आहे. रक्तदान शिबिरासारखा जीवनदायी उपक्रम हाती घेऊन मंडळाने पुन्हा एकदा समाजसेवेची परंपरा कायम ठेवली आहे.
रक्ताची गरज ही कोणत्याही क्षणी उद्भवू शकते. अपघात, शस्त्रक्रिया, गंभीर आजार अशा परिस्थितीत रुग्णांना तातडीने रक्ताची आवश्यकता भासते. अशा वेळी स्वेच्छेने दिलेले रक्त अनेकांचे प्राण वाचवू शकते. या पार्श्वभूमीवर जास्तीत जास्त नागरिकांनी रक्तदान शिबिरात सहभागी होऊन रक्तदान करावे, असे आवाहन बळीराजा मित्र मंडळाच्या पदाधिकाऱ्यांनी केले आहे.
शिबिरात वैद्यकीय तज्ञांची टीम उपस्थित राहणार असून रक्तदात्यांची आवश्यक तपासणी करूनच रक्तसंकलन केले जाणार आहे. रक्तदात्यांना प्रमाणपत्र देण्यात येणार असून त्यांच्यासाठी अल्पोपहाराचीही व्यवस्था करण्यात आली आहे.
गुगळी धामणगाव व परिसरातील युवक, नागरिक, सामाजिक कार्यकर्ते तसेच विविध संस्थांनी या उपक्रमाला उत्स्फूर्त प्रतिसाद देऊन छत्रपती शिवाजी महाराजांच्या जयंतीनिमित्त रक्तदानाचा संकल्प पूर्ण करावा, असे आवाहन आयोजकांच्या वतीने करण्यात आले आहे.