आडगाव जिल्हा परिषद शाळेत उत्साहात प्रवेशोत्सव

हिंगोली(प्रतिनिधी)
स्थानिक जिल्हा परिषद प्राथमिक शाळा आडगाव येथे नवीन शैक्षणिक वर्षाच्या पहिल्या दिवशी प्रवेशोत्सव कार्यक्रम अत्यंत उत्साहात आणि आनंदी वातावरणात पार पडला. याप्रसंगी शाळेत पहिल्यांदाच पाऊल ठेवणाऱ्या नवोदित विद्यार्थ्यांचे उत्साहात स्वागत करण्यात आले.
या कार्यक्रमाला प्रमुख अतिथी म्हणून भारतीय जनता युवा मोर्चाचे जिल्हाध्यक्ष शिवाजीराव मुटकुळे उपस्थित होते. त्यांच्या हस्ते नव्याने प्रवेश घेणाऱ्या चिमुरड्या विद्यार्थ्यांना हार आणि पुष्पगुच्छ देऊन शाळेत स्वागत करण्यात आले. यासोबतच शासनाच्या वतीने देण्यात येणारे मोफत शालेय गणवेश आणि पाठ्यपुस्तकांचे वाटपही मान्यवरांच्या हस्ते करण्यात आले. नवीन पुस्तके आणि गणवेश मिळाल्याने विद्यार्थ्यांच्या चेहऱ्यावर मोठा आनंद दिसून येत होता.
भव्य ट्रॅक्टर दिंडीने वेधले गावकऱ्यांचे लक्ष
या प्रवेशोत्सवाचे मुख्य आकर्षण विद्यार्थ्यांची ‘प्रवेशदिंडी’ ठरली. ट्रॅक्टरला आकर्षक सजावट करून गावातील मुख्य रस्त्यांवरून ही भव्य दिंडी काढण्यात आली. यावेळी मुटकुळे यांच्या हस्ते रिबीन कापून या दिंडीचे रीतसर उद्घाटन करण्यात आले. ‘शाळा भरली, शाळा भरली’ अशा घोषणा देत निघालेल्या या दिंडीने संपूर्ण गावाचे लक्ष वेधून घेतले.
या सोहळ्याप्रसंगी भाजपचे विविध पदाधिकारी, शाळेचे मुख्याध्यापक, शिक्षक वृंद, गावातील प्रतिष्ठित नागरिक, ग्रामस्थ, माता पालक आणि विद्यार्थी मोठ्या संख्येने उपस्थित होते. हा सोहळा यशस्वी करण्यासाठी शाळा व्यवस्थापन समिती आणि शिक्षकांनी विशेष परिश्रम घेतले.