शेतकऱ्यांच्या खात्यावर गुरूवारपर्यंत ५ हजार रुपयांची रक्कम जमा होणार

राज्य मंत्रिमंडळाची बैठक मुख्यमंत्री देवेंद्र फडणवीस यांच्या अध्यक्षतेखाली संपन्न झाली. या बैठकीत दुष्काळासंदर्भातील उपाययोजनांवर चर्चा करण्यात आली. यावेळी पात्र शेतकऱ्यांच्या खात्यावर गुरूवारपर्यंत ५ हजार रक्कम जमा करण्याचे निर्देश देण्यात आले.

  दीड कोटी शेतकऱ्यांना मिळणार लाभ
राज्य सरकारच्या या महत्त्वपूर्ण निर्णयामुळे राज्यातील तब्बल १ कोटी ५० लाख शेतकऱ्यांना दिलासा मिळणार आहे. दुष्काळामुळे अडचणीत सापडलेल्या शेतकऱ्यांना तातडीने आर्थिक हातभार लागावा, यासाठी प्रत्येक पात्र शेतकऱ्याला ५ हजार रूपये अग्रिम मदत थेट बँक खात्यात जमा केली जाणार आहे. या संपूर्ण योजनेसाठी राज्य सरकारकडून ७ हजार ५०० कोटी रूपयांचा एकूण खर्च केला जाणार असल्याची माहिती मंत्रिमंडळ बैठकीतील सूत्रांनी दिली आहे.

 

मदतीचे पैसे कुणीही कापून घेणार नाही, बँकांना स्पष्ट निर्देश

शेतकऱ्यांना मिळणारी ही मदत कोणतीही कपात न करता पूर्णपणे हातात मिळायला हवी, यासाठी मुख्यमंत्र्यांनी विशेष दक्षता घेतली आहे. कोणतीही बँक या मदतीच्या रकमेतून जुनी कर्ज किंवा इतर कारणांसाठी पैसे कापून घेणार नाही, असे स्पष्ट आदेश बँकांना द्यावेत, अशा स्पष्ट सूचना मुख्यमंत्री देवेंद्र फडणवीस यांनी संबंधित अधिकाऱ्यांना दिल्या आहेत.