सोन्याचे भाव तब्बल ३,००० रुपयांनी तर चांदी ७,००० रुपयांनी घसरले

सामान्यतः जेव्हा जगात युद्धजन्य परिस्थिती निर्माण होते, तेव्हा सोन्याचे दर वाढतात. पण यावेळी अमेरिका आणि इराणमधील तणावानंतरही सोन्याचे भाव कोसळत आहेत. यामागे एक वेगळेच आर्थिक गणित आहे.

अमेरिका-इराण युद्धामुळे कच्चे तेल (क्रूड ऑईल) महाग होत आहे. तेल महागल्यामुळे महागाई वाढेल आणि ही महागाई आटोक्यात आणण्यासाठी अमेरिकन फेडरल रिझर्व्ह व्याजाचे दर वाढवू शकते, असा अंदाज व्यक्त केला जात आहे. व्याजदर वाढल्यास गुंतवणूकदार सोन्यातील पैसे काढून बँका किंवा अमेरिकन बाँड्समध्ये गुंतवणे पसंत करतात. सोन्यावर कोणतेही थेट व्याज मिळत नाही. म्हणूनच सध्या युद्धापेक्षा महागडे तेल आणि अमेरिकेचे व्याजदर हे सोन्याच्या घसरणीला कारणीभूत ठरत आहेत.

पुढच्या आठवड्यात सोन्याची चाल कशी असेल?

कमोडिटी तज्ज्ञ मनोज कुमार जैन यांच्या मते, एमसीएक्स (MCX) वर सोन्यासाठी १,३९,६०० ते १,३८,८०० रुपये हा अत्यंत महत्त्वाचा सपोर्ट आहे. तर वरच्या बाजूला १,४१,१०० ते १,४२,००० रुपयांवर रेझिस्टन्स आहे. सोप्या भाषेत सांगायचे तर, जर सोन्याचा भाव १,३८,८०० रुपयांच्या खाली गेला, तर बाजारात मोठी घसरण पाहायला मिळू शकते. पण जर भाव १,४२,००० रुपयांच्या वर टिकून राहिले, तर पुन्हा वेगाने तेजी परतू शकते.

चांदीमध्ये जास्त धोके का?

चांदीमध्ये सोन्यापेक्षा जास्त चढ-उतार पाहायला मिळण्याची शक्यता आहे. चांदीचा वापर केवळ दागिन्यांसाठी होत नाही, तर सोलर पॅनेल, इलेक्ट्रिक वाहने (EVs) आणि आर्टिफिशियल इंटेलिजन्स (AI) मधील उपकरणांमध्ये मोठ्या प्रमाणावर होतो.

केडिया कमोडिटीचे एमडी अजय केडिया यांच्या मते, चांदीसाठी २,११,१०० रुपये हा मुख्य सपोर्ट आहे. जर चांदी या पातळीच्या खाली गेली तर मोठी मंदी येईल. पण जर ती २,२१,००० रुपयांच्या वर गेली, तर थेट २,२४,००० ते २,२६,००० रुपयांपर्यंत झेप घेऊ शकते.

सामान्य ग्राहकांनी आणि गुंतवणूकदारांनी आता काय करावे?

जर तुमच्या घरी लग्नकार्य असेल किंवा तुम्हाला दागिन्यांची गरज असेल, तर एकाच वेळी सर्व पैसे गुंतवून खरेदी करू नका, असा सल्ला एक्सपर्टने दिला आहे.

सध्या बाजारात आलेल्या या घसरणीचा फायदा घेत गरजेच्या एकूण दागिन्यांपैकी २५ ते ३० टक्के खरेदी आता करून घ्यावी. उर्वरित खरेदी पुढील आठवड्यातील दरांचा अंदाज घेऊन टप्प्याटप्प्याने करण्याचा सल्ला दिला जात आहे.

एमसीएक्स (MCX) वर दिसणारे भाव आणि ज्वेलर्सच्या दुकानातील भाव यात फरक असतो. दुकानातील दरांमध्ये ३% जीएसटी (GST), मेकिंग चार्जेस (घडणावळ) आणि सराफाचा नफा जोडला जातो.

पुढच्या आठवड्यात काय?

२८-२९ जुलै रोजी अमेरिकन फेडची महत्त्वाची बैठक आहे. त्यापूर्वी पुढील आठवड्यात अमेरिकेतील बेरोजगारी आणि गृहनिर्माण क्षेत्राचे आकडे जाहीर होणार आहेत, ज्याचा थेट परिणाम सोने-चांदीच्या दरांवर होईल.