Shabdraj www.shabdraj.com
मोठ्या व्यवहारांसाठी चेक दिला जातो, काहींचे पगारही चेकद्वारे आजही काढले जातात. मग अशावेळी पैसे खात्यावर येण्यासाठी वाट पाहावी लागते. चेक देणारा आणि घेणाऱ्याची बँक एकच असेल तर एक दिवसात चेक क्लिअर होतो. मात्र एका बँकेतून दुसऱ्या बँकेत चेक जाणार असेल तर त्यासाठी एक दोन तीन पैकी कितीही दिवसांचा अवधी लागतो. मात्र आता ही सगळी कटकट संपणार आहे. तुमच्या खात्यावर अवघ्या काही तासांत पैसे जमा होणार.
रिझर्व्ह बँकेने (RBI) चेकद्वारे पेमेंट करणाऱ्या कोट्यवधी बँक ग्राहकांना दिलासा दिला. काही तासांतच चेकचं पेमेंट होणार आहे. RBI ने चेक पेमेंटचे नियम आणि प्रक्रियेत बदल केला आहे. हे नवीन नियम 4 ऑक्टोबरपासून लागू होणार आहेत. दसऱ्यानंतर आणि दिवाळीपूर्वी, कोट्यवधी बँक ग्राहकांना चेकद्वारे पेमेंट करण्यासाठी आणि पेमेंट घेण्यासाठी तीन दिवसांऐवजी फक्त काही तास लागतील. सोप्या भाषेत सांगायचं तर, चेक बँकेत जमा केल्याच्या दिवशी खात्यात पैसे येतील.
सध्या, चेक क्लिअर होण्यासाठी T+1 म्हणजेच पुढील कामकाजाच्या दिवशी लागतो. जर चेक दुसऱ्या बँकेचा असेल तर त्यालाही तीन दिवस लागतात. आता ही प्रणाली दिवसांऐवजी काही तासांपर्यंत कमी केली जाईल.
