तर एकही मराठा शनिवारी-रविवारी घरी राहणार नाही-मनोज जरांगे पाटील यांचा इशारा

जरांगे पाटील म्हणाले, जालन्यात १९३० साली ९७ हजार कुणबी होते, कुणब्यांच्या घरात पाच पाच मुले धरा, मग १९३० च्या तुलनेत पाच ते दहापट वाढलेले कुणबी आत्ता कुठे गेले? तसेच संभाजीनगरला १ लाख २३ हजार कुणबी होते, आता ते कुणबी गेले कुठे? असे सवाल जरांगे पाटील यांनी समितीच्या अध्यक्षांना आणि सदस्यांना विचारले. त्यावर गॅझिटियरमध्ये कुणबी नोंदी आहेत परंतु त्यात नावे-आडनावे नसल्याने कुणाच्या कुणबी नोंदी आहेत, हे तपासावे लागेल, असा युक्तिवाद न्या. शिंदे (निवृत्त) यांनी केला. त्यावर मराठ्यांसाठीच ते गॅझिटियर आहे, त्यात नोंदी आमच्याच असतील ना, दुसऱ्या कुणाच्या असतील, असा उलटप्रश्न जरांगे पाटील यांनी विचारला. जरांगे पाटील यांचे म्हणणे ऐकून घेऊन यावरच अभ्यास करून सरकारला निर्णय घ्यावा लागेल. सरधोपटपणे कुणबी दाखले वाटता येत नाहीत, असे समितीचे अध्यक्ष न्या. शिंदे (निवृत्त) म्हणाले.