इंद्रायणीच्या पुरात परभणीतील वारकऱ्यांची वाहने अडकली

घटनेची माहिती मिळताच पाथरी विधानसभा मतदारसंघाचे आमदार राजेश विटेकर यांनी तातडीने आळंदी येथील प्रशासनाशी दूरध्वनीवरून संपर्क साधत मदतकार्याला गती देण्याच्या सूचना दिल्या. अडकलेल्या वारकऱ्यांना सुरक्षितस्थळी हलविणे, पुरात अडकलेली दोन्ही वाहने बाहेर काढण्यासाठी यंत्रणा तैनात करणे तसेच आवश्यक ती मदत तातडीने उपलब्ध करून देण्याबाबत त्यांनी प्रशासनाला निर्देश दिले. त्यांच्या हस्तक्षेपानंतर स्थानिक प्रशासनाने बचाव व मदतकार्याला वेग दिला.

वारीसाठी भाविकांनी मोठ्या श्रद्धेने आणलेले अन्नधान्य, किराणा साहित्य आणि अन्नदानासाठी जमा केलेली रक्कम पुराच्या पाण्यात वाहून गेल्याने वारकऱ्यांवर मोठे आर्थिक संकट ओढवले आहे. या नुकसानीचा पंचनामा करून शासनाने तातडीने आर्थिक मदत व नुकसानभरपाई द्यावी, अशी मागणी वारकरी आणि ग्रामस्थांकडून करण्यात येत आहे.