राहुल गांधींचा पोलिसांना चकवा, थेट मोदींच्या घराला घेरावा

नीट पेपरफुटीविरोधातील आंदोलनाने निर्णायक वळण घेतले असून लाठीहल्ल्याच्या दुसऱ्या दिवशीही जंतर मंतरवर अभिजीत दिपके यांच्या नेतृत्वाखालील देशभरातील विद्यार्थ्यांचे धरणे आंदोलन सुरूच आहे. शिक्षणमंत्री धर्मेंद्र प्रधान यांचा राजीनामा घेतला जात नाही तोपर्यंत मागे हटणार नाही, असा पवित्रा आंदोलन विद्यार्थ्यांनी घेतला आहे. याच विद्यार्थ्यांना पाठिंबा देण्याकरिता लोकसभेचे विरोधी पक्षनेते राहुल गांधी, काँग्रेस अध्यक्ष मल्लिकार्जून खरगे, ज्येष्ठ नेते शरद पवार, काँग्रेस नेत्या प्रियांका गांधी तसेच इंडिया आघाडीतील विविध पक्षांच्या खासदारांनी पंतप्रधान नरेंद्र मोदी यांच्या निवासस्थानाबाहेर धरणे आंदोलन सुरू केले. गेल्या सव्वा दोन तासांपासून हे आंदोलन सुरू आहे.