Shabdraj www.shabdraj.com
Bollywood News Marathi
मुंबई – NEET पेपरफुटी प्रकरणावरून देशभरात संतापाची लाट उसळली असून विद्यार्थ्यांच्या आंदोलनाला आता बॉलिवूडमधूनही पाठिंबा मिळू लागला आहे. प्रसिद्ध अभिनेत्री करीना कपूर खान हिने सोशल मीडियावर भावनिक पोस्ट शेअर करत लाखो विद्यार्थ्यांच्या भविष्याची चिंता व्यक्त केली आहे. “आता मी या विषयावर अधिक काळ शांत राहू शकत नाही,” असे स्पष्ट शब्दांत तिने आपली भूमिका मांडली.
“विद्यार्थ्यांच्या आवाजाकडे दुर्लक्ष करता येणार नाही”
इन्स्टाग्रामवरील पोस्टमध्ये करीना कपूर म्हणाली,
“मी गेल्या काही दिवसांपासून या विषयावर विचार करत होते. पण आता अधिक काळ शांत राहणे शक्य नाही. आपले मत मांडण्यासाठी रस्त्यावर उतरलेल्या आणि न्यायाची मागणी करणाऱ्या इतक्या मोठ्या संख्येतील तरुणांच्या आवाजाकडे दुर्लक्ष करणे अशक्य आहे… आणि तसे केलेही जाऊ नये.”
तिने पुढे शिक्षणाचे महत्त्व अधोरेखित करत म्हटले,
“प्रत्येक मुलाच्या आयुष्यात शिक्षणाला अनन्यसाधारण महत्त्व असते. शिक्षण त्यांना आत्मविश्वास देते, आशा देते आणि उद्याचा दिवस अधिक चांगला असेल, असा विश्वास त्यांच्या कुटुंबालाही देते.”
View this post on Instagram
“विद्यार्थ्यांचा व्यवस्थेवरील विश्वास ढासळता कामा नये”
करीनाने आपल्या पोस्टमध्ये शिक्षण व्यवस्थेतील पारदर्शकतेवरही भर दिला.
“शिक्षण तेव्हाच प्रभावी ठरते, जेव्हा विद्यार्थ्यांचा त्यावर विश्वास असतो. जर प्रामाणिकपणा, कठोर परिश्रम आणि गुणवत्ता यांना महत्त्व उरले नाही, असा संशय विद्यार्थ्यांच्या मनात निर्माण झाला, तर व्यवस्थेवरील त्यांचा विश्वास पूर्णपणे ढासळतो.”
तिने पुढे म्हटले,
“आपली मेहनत पुरेशी ठरेल की नाही, असा प्रश्न कोणत्याही विद्यार्थ्याला पडू नये. विद्यार्थ्यांना अशी पारदर्शक व्यवस्था हवी, ज्यावर ते डोळे झाकून विश्वास ठेवू शकतील. जिथे गुणवत्तेला योग्य सन्मान मिळेल, कष्टाचे चीज होईल आणि प्रत्येक विद्यार्थ्याला समान संधी मिळेल. ही कोणतीही अवास्तव मागणी नसून शिक्षण व्यवस्थेची मूलभूत गरज आहे.”
“विद्यार्थ्यांचे ऐकणे ही जबाबदारी आहे”
पोस्टच्या शेवटी करीना कपूरने समाज आणि प्रशासनाला विद्यार्थ्यांचे म्हणणे गांभीर्याने ऐकण्याचे आवाहन केले.
“जेव्हा संपूर्ण पिढी स्वतःच्या भविष्याबद्दल आवाज उठवते, तेव्हा त्यांचे म्हणणे ऐकणे हा कोणावरही उपकार नसतो; ती आपली नैतिक जबाबदारी असते. आपली मुले आपल्याकडे बारकाईने पाहत असतात. आज आपण घेतलेली भूमिका त्यांना सांगेल की निष्पक्षता आणि विश्वास या मूल्यांना आजही स्थान आहे. ही मुले फक्त उद्याची तयारी करत नाहीत, तर तीच आपल्या देशाचा उद्याचा भविष्यकाळ आहेत.”
